星期二,請假一日,跟魯婆仔、世伯、阿嫂一行四人返魯婆仔鄉下摘荔枝! 到步之後,世伯決定先填飽個肚再開工,於是去咗一間叫"鑫福"嘅酒樓開餐。
哩間嘢D燒鵝唔會太肥,皮又夠脆,用嚟送瀨粉同米粉就至正!我地仲叫咗紙包骨、叉燒包同油麥菜,樣樣都幾好食,不過炒菜D油就重手咗D...
食完嘢,行一陣就到世伯東莞間屋,屋前棵荔枝樹有兩層樓高,荔枝生到一樹都係!
早排發咗一個好搞嘢嘅夢,夢見自己响屋企(北角)嗰頭行行吓街,腳下突然傳出叮叮咚咚嘅聲響,垂頭一望,發現英皇道其中一段行人路,竟然變成咗一排鋼琴黒白鍵;路人行過都傳出叮叮咚咚嘅琴聲,非常搞鬼!有D識彈琴嘅小朋友,仲有節奏地响琴鍵街上跳嚟跳去,用雙腳彈出一首又一首輕快嘅樂曲。
街上路人都議論紛紛,我從路人嘅傾談中,得知原來係政府為咗振興香港旅遊業,又試亂花納稅人D錢,無厘頭地整咗條懶有特色嘅琴鍵街出嚟...更據聞全港十八區,將會陸陸續續建設出唔同特色嘅有趣街道...(汗)
琴鍵街落成幾日之後,開始有市民投訴琴鍵街發出嘅聲響嚴重嘈住佢哋瞓覺,做成咗好大嘅滋擾...結果,政府又一次俾市民插到飛起...
尋晚單拖睇咗 《未來戰士2018》,無計,魯婆仔因為未睇過之前幾集,我唯有自己去睇...
未來戰士嚟到第四集,智能電腦「天網」自2004年發難之後,與人類不斷爭戰至2018年,雖然「天網」所生產嘅機械兵團「殲滅者」一直都佔晒上峰,但始終無法完全殲滅以尊康納為首嘅人類反抗軍。於是「天網」就將一名來自過去嘅死刑犯馬克斯改造成一個半人半機械嘅「混合型殲滅者」,「天網」更刻意令馬克斯自己都唔知自己已經被改造,然後將佢放遂出去,等佢自自然然地投靠人類領袖尊康納 。
馬克斯在途上曾巧遇少年卡爾雷斯(尊康納嘅爸爸),卻又因被「殲滅者」追捕而與卡爾雷斯失散。經過千辛萬苦,馬克斯終於去到反抗軍基地,卻意外被地雷炸致皮破肉綻,露出咗機械骨架,哩個時候佢至知道自己已經唔再係人,更慘遭尊康納追殺;但當尊康納追殺馬克斯時,咁橋又遇上「海上殲滅者」嘅襲擊,幸得馬克斯出手救回一命。馬克斯哩個「殲滅者」充滿人性嘅表現令尊康納不知所惜,加上從馬克斯口中得知自己父親被「天網」所捉,尊康納決定相信馬克斯,與馬克斯裏應外合潛入「天網」基地,拯救父親。
整個局都係「天網」嘅巧妙安排,只要「天網」向回巢嘅馬克斯發出指令,馬克斯哩個「混合型殲滅者」就會惟命是從,咁尊康納就死硬;點知馬克斯嘅「人性」竟然不受「天網」控制,最終協助尊康納救出卡爾雷斯,仲合力對付基地中嘅「殲滅者T-800」(阿諾舒華辛力加),炸毀「天網」基地。
馬克斯雖然身軀被改造成機械人,但仍保留住人類嘅「心靈」,複雜嘅「人性」係連智能電腦「天網」都無法計算同明白嘅嘢,電腦冇「愛」亦都冇「情」,有都係虛擬出嚟嘅,哩點就注定咗「天網」必定戰勝唔到佢嘅創造者---「人類」。
